Un encuentro ku Dios

Tin momentonan den nos bida ku ta solamente Dios por kambia un situashon. Esaki tabata e kaso ku Jakob, kende tabata preparando pa topa ku su ruman kende ela engañá den pasado.

Jakob su nomber tabata nifika: gañado,hasido di triki y esey a keda kumplí na momento ku ela kita derecho di yu major for di Esou. Awor Esou tabata bin kontrele ku 400 homber, Jakob a spanta masha. Gen 32:7

Jakob a bini ku un plan pa parti su hendenan y bestianan den dos grupo, ela bisa “si Esou ataka un grupo ahinda e otro grupo por hui ( vers 8) Ketu bai e tabata konfia riba su mes trikinan, pero spantá manera e tabata ela teme ku e plan por faya y ela resa y pidi Dios pa judele.

E anochi ey e tabata tin un encuentro ku Dios, un homber a lucha ku ne te den kibrá di mainta (vers 24) durante di e lucha Jacob a etrega su naturá di gañadó y a risibi e bendishon ku e tabata buska (vers 27-30)

Ora bo tin un enkuentro ku Dios, E lo por kambiá of keda sin kambiá otro hende, pero lo e kambia abo si. Y na momento ku E kambia Abo, e ta krea oportunidad pa kambia otronan.

Durante e tempu di Jakob su spantu y e jegada di su ruman, ela topa ku Dios, y e encuentro ey a kambia un situashon ku tabata parse imposibel. Na luga di tuma revancha, Esou a kore brasele y sunchié y nan a yora huntu ( gen 33:4)

Dios por kambia bo situashon imposibel tambe si bo ta buskele di henter bo kurason y bo ta entrega bo boluntad a kambio di e mihor plan ku E tin pa bo bida.

Deklarashon di fé
Dios por kambia tur mi situashon ku ta parse imposibel den victoria ora mi entrega mi kurason i mi boluntad na djÉ y asepta su plan pa mi bida.