Separashon entre hende i Dios

Bo sa kiko ta lokual ku ta pone ku nos ta pone un separashon entre nos
Kreador I nos?
E respuesta ta e piká. Pero pa nos por kompronde esaki mas miho laga
nos wak algun  definishonan di piká:

1. Piká ta un desbiashon moral di e ser humano ku ta hibele na un
kondukta ofensive  dilanti Dios.
2. Piká ta lokual ku ta stroba hende di tin un relashon ku Dios.
3. Piká ta tur kos ku no bini dor di fe, ta piká. (Rom.14,23b)
4. E sumpiña di morto ta e piká. (1Cor. 15.56b)
5. Pika ta no kere den Kristu-Hesus.
6. Ken ku praktiká piká ta praktika kibramentu di Lei tambe; I piká
ta kibramentu di lei. (1juan3. 4)

Tin hopi definishonan di pika den Beibel, pero tur ta hiba nos na mes
un kaminda, no ta kumbini nos niun di peka. Kada biaha ku nos hasiele nos
ta pone un separashon entre Dios i nos.  Pero pa nos por stop di peka
nos mester konose kiko ta pika I unda e ta nanse. Laga nos wak unda e
piká a kuminsa: Genesis 3. 1-7.

Mi ke pa nos para ketu un rato den e vers. 6 kaminda ta bisa: “anto
e muhe a wak ku e palu tabata bon pa kome, agradabel den su vista, deseabel
den su kurason pa e por alkansa e sabiduria, anto e ora ei e la toma e
fruto i e la kome”.

Akinan e piká a kuminsá. Na prome instante e la mira ku e kos
prohibí ei tabata bon pa kome… Kuantu biaha nos wowonan ta mira kos ku nan no mester mira? Kuantu biaha nos wowonan ta kuminsa desea kosnan ku nan ta mira? I nos ta bai tras di loke ku nan ta mira sin paga tinu si e kos ta kumbini si of no? 

nos no por move den bida pa medio di loke ku nos wowonan ta mira, pasombra mi no sa si bo ta korda ku Satanás tabata e angel di mas bunita di shelu? No tur kos ku ta bria ta oro. Mi ta gusta hopi e definishon di fe ku ta bisa: fe ta e siguransa di kosnan ku hende ta spera, e konvikshon di kosnan ku hende NO  ta mira.

Kemen no pa  loke ku nos ta mira pero pa loke ku nos no ta mira. Un Kristiano mester move pa medio di fe, pa medio di e Spiritu,  nos wowonan ta gaña nos, I nan ta e kuminsamento di diferente sentimentunan robes den nos kurason, nan ta pone nos karni bira  aktivo dor di inka den dje e deseonan ku ta bai kontra Dios.

Awo e versikulo den Génesis ta mustranos ku Eva a wak ku e palu
tabata agradabel den su vista. E palabra ta siña nos ku nos ta husga
aparensia, pero Dios ta husga kurasonan, no semper pasombra un kos ta mustra “dushi di pa’fo” e ta dushi di pa den, un di e miho strategianan di diabel ta ku tur su kosnan ta “agradabel”, “dushi”, “fasil”.

I pesei hende ta kai fasil den nan. E mester laga nos sinti nos mes bon, ku e maldat pa nos por hasiele, pero despues e zuur ta bini su tras;  sexo, drogas, gañamentu, fiestamentu, golosidat pa placa, fornikashon, etc,  tur ta kosnan “dushi” en prome instante, pero ku una ves bo ta den nan desgrasia so ta guardabo.
 
Despues nos por lesa ku e la desea, esaki ta e peliger di mas grandi e
deseonan, pa so tur deseo ke wordu kumpli, tur mal deseo den kurason ta hibabo na kudisha i komete piká. Den Santiago 1.14 ta bisa: “ma kada un ta
wordu tenta ora ku e wordu atraí i sedusi dor di su mes pashon, anto ora
pashon konsebi, e ta duna lus na piká; I ora piká keda kumplí, e ta
produsi morto”.

Kemen nos ta komete piká fasilmente ora nos laga nos mal deseonan dominá nos kurpa I nos mente. Paso ya nos no por hasi lokual ku nos ke, pero lokual ku nos no ke, paso e deseo ta bira mas fuerte ku e obedensha na lokual ku Dios ke pa nos hasi.  

Esaki ta hiba nos na sinti tur sorto di kosnan negativo den nos,  manera: inmoralidat, Impuresa, sensualidat, idolatria, bruheria, hostilidat, bringamentu, yalursheit, rabiamentu, pleitamentu, desakuerdo, doktrina falsu, envidia, buracheria,
parandiamentu, entre otro.

Importante ta pa nos por wak bon den nos bida si nos tin algun di e
kosnan aki, pa nos por stop ku nan pasombra tur persona ku hasi un di e
kosnan aki, of paresido, lo no hereda e Reino di Dios. Paso pago di piká ta
morto. No tin nada otro.

E berdat ta ku nos tur ta faya ku un of otro di e
kosnan aki, pero ora bo ta rekonose bo fout, I bo ta arepentí di dje di
kurason, Dios ta fiel I hustu pa pordona bo, pero si nos ke pa bai nos bon den bida i pa ora e dia yega ku  Kristu lo bini riba nubianan di shelu, e por tuma nos pa nos por komparti huntu ku ne eternamente den su Paraiso.

Mi ta termina ku e ver di Rom. 6.11 ku ta bisa:
“Meskos, boso tambe konsiderá boso mes morto pa piká, ma bibu pa
Dios den Kristu Hesus”.

Oh, Señor oh Dios, mi ta gradisibu pa e oportunidat ku bo ta dunami
di por sa ku kada biaha ku mi peka mi ta aparta for di bo I bo ta aparta for di mi. yudami mi Señor pa kada dia ku habri mi por biba un bida sin piká pa por agradabu i sirbibu manera debe ser.

Pordona mi pikánan, yudami
deskubri esnan ku ta skondí i dunami e fortalesa pa mi por laga nan para. Tur esaki mi ta pidibu den nomber di Kristu-Hesus, Amen.